Misjonshelg og misjonsstemne i Norheimsund

Søndag 8. august var det misjonsstemne på garden Sæleset i Norheimsund i Hardanger. Det var strålande ver, og deltakarane hadde panorama utsikt over Hardangerfjorden og Folgefonna. Stemne var arrangert som ein del av ei misjonshelg i Norheimsund Bedehus der Norvald Yri og kona Anna Årsland Yri tok del.

 
Frelsesvisse
Fredag kveld talte Norvald Yri over emnet: Frelsevisse. Han nemnde ulike grupperingar opp gjennom tida som har hatt og har fokus på at kristen tru er noko meir enn å bli rettferdiggjort. Han meinte at desse samanhengane ikkje tek på alvor at den truande enno ber på arvesynda.

Han siterte Per Nordsletten som syng : «Men akk, jeg har et kjød / som alltid gjør meg møye, / det er jo dømt til død, / men vil seg ikke bøye» Han meinte at ein kvar kristen ville gjere den same erfaring som Per Nordsletten gjorde med den syndige naturen.

Han kom deretter inn på «Tornen i kjøtet», og den plage som høyrer til den gamle natur.

Paulus hadde fått ein torn i kjøtet, ein Satans engel som skulle slå han, så han ikkje skulle opphøgje seg.

Han peika vidare på at arvesynda er noko ein har frå fødselen av. I møte med Den Heilage Gud ser ein synda og gjer same erfaring som Peter: - Gå frå meg, for eg er ein syndig mann.

Men han understreka også det Per Nordsletten syng:  «O min Frelser så kjær, / kan du slik som jeg er / ta imot meg og feste til brud? / Og kan du ha meg kjær / selv så heslig jeg er, / da er du en forunderlig Gud.»

Wisløff minna om Stedfortredaren
Han nemnde at han ofte hadde hatt høve til å vitje Carl Fr. Wisløff. - Dei siste gongene eg var innom og besøkte Wisløff  før han døydde, snakka me om det som låg han på hjarta. Då kom han stadig attende til Stedfortredaren.

- I Stedfortredaren Kristus er det inga fordøming for syndaren. I Stedfortrendaren vart lova sitt rettferdige krav oppfylt. Stedfortredaren blei dømd i din og min stad. Det er grunnen til at det ikkje er noko fordøming for deg og meg.

 - Så kan ein kristen tenkje at ein er urein i seg sjølv og i sitt eige hjarta. Ein kan tenkje at ein ikkje kan tru seg frelst slik som ein er. Men då talar Skrifta om den «som ikkje har gjerningar, men som trur på han som rettferdiggjer den ugudelege, han får si tru tilrekna som rettferd.»  Det er som sangaren syng: «Ren og rettferdig, / himmelen verdig / er jeg i verdens Frelser alt nu, / Ordet forkynner / at mine synder / kommer han aldri mere i hu.», sa Norvald Yri.

 
Ei oppfylt lov
- Du som er ein kristen har eit liv i Kristus. Dette Livet har oppfylt Guds lov. Stedfortredaren gjorde soning med sitt eige blod, og ikkje med sølv eller gull. Det er Gud som erklærer deg rettferdig i Kristus, når han viser Gud dei naglemerkte hender, påpeika han.

Peter hadde vore på «fjellet» saman med meisteren. Han hadde vore augnevitne

til Guds stordom og så skriv han: «dess fastare har vi profetordet, som de gjer vel i å akta på. Det er som ei lampe som lyser på ein mørk stad, til dagen lyser fram og morgonstjerna går opp i hjarto dykkar.»

Når du er utsett for djevelen sine listige angrep og han seier: - Du kan ikkje vere ein kristen, då skal du få vise til Stedfortredaren, understreka Yri mot slutten.

Laurdag kveld tok han utgangspunkt i korleis dei i den første tid held urokkeleg fast på bønene, før han gjekk vidare med å tale om brødsbrytinga, samfunnet og læra. På stemnedagen sundag tala han m.a. om korleis Jesu tala med Emmausvandrarane og understreka at det ikkje nyttar å «gå» om ikkje Jesus går med. Yri formidla også inntrykk frå korleis evangeliet går fram i Afrika i dag.

Norvald Yri held for tida til ved Fjellhaug Misjonshøgskule der han arbeider som forskar med fokus på misjon. Han held også på med eit misjonsverk gjeldande misjonskallet som det norske kristenfolk fekk då vekkingane kom til Norge og dei ulike misjonsorganisasjonane blei stifta.

Av Dag Rune Lid